ប្រែសម្រួល៖ រ៉ាម៉េត
ម្យូនិក/វ៉ាស៊ីនតោន ថ្ងៃទី១៥ កុម្ភៈ (រយទ័រ) – មន្ត្រីអាមេរិក និងរុស្ស៊ីនឹងជួបគ្នានៅប្រទេសអារ៉ាប៊ីសាអូឌីតក្នុងពេលឆាប់ៗខាងមុខនេះ ដើម្បីចាប់ផ្តើមការចរចាដែលមានគោលបំណងបញ្ចប់សង្គ្រាមរបស់មូស្គូក្នុងប្រទេសអ៊ុយក្រែនដែលបានចាប់ផ្តើមអស់រយៈពេលជិតបីឆ្នាំមកហើយ។ នេះបើយោងតាមសមាជិកសភាអាមេរិកម្នាក់ និងប្រភពដែលជិតស្និទ្ធនឹងការរៀបចំផែនការនេះបាននិយាយកាលពីថ្ងៃសៅរ៍។

ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡិនស្គី ដែលបានជួបជាមួយអនុប្រធានាធិបតីអាមេរិក លោក ជេឌី វ៉ាន់ស៍ នៅប្រទេសអាល្លឺម៉ង់កាលពីថ្ងៃសុក្រ បាននិយាយថា អ៊ុយក្រែនមិនត្រូវបានអញ្ជើញឱ្យចូលរួមក្នុងការចរចានៅអារ៉ាប៊ីសាអូឌីតទេ ហើយក្រុងគីវនឹងមិនចូលរួមចរចាជាមួយរុស្ស៊ីមុនពេលពិគ្រោះយោបល់ជាមួយដៃគូយុទ្ធសាស្ត្រឡើយ។

រដ្ឋមន្ត្រីការបរទេសអាមេរិក លោក ម៉ាកូ រូប៊ីយ៉ូ ទីប្រឹក្សាសន្តិសុខជាតិ លោក ម៉ៃក៍ វ៉ូលស៍ និងប្រតិភូពិសេសសម្រាប់មជ្ឈិមបូព៌ារបស់សេតវិមាន លោក ស្ទីវ វីតខូហ្វ នឹងធ្វើដំណើរទៅកាន់អារ៉ាប៊ីសាអូឌីត នេះបើយោងតាមតំណាងរាស្ត្រអាមេរិក លោក ម៉ៃឃើល ម៉ាខល បានប្រាប់កាសែត រយទ័រ។ មិនទាន់មានការបញ្ជាក់ច្បាស់នៅឡើយទេថា តើពួកគេនឹងជួបជាមួយនរណាខ្លះពីភាគីរុស្ស៊ី។

នៅក្រៅកិច្ចប្រជុំសន្និសីទសន្តិសុខម្យូនិក លោក ម៉ាខល បាននិយាយថា គោលបំណងនៃការចរចានេះគឺដើម្បីរៀបចំការជួបគ្នារវាងប្រធានាធិបតីអាមេរិក លោក ដូណាល់ ត្រាំ ប្រធានាធិបតីរុស្ស៊ី លោក វ្លាឌីមៀរ ពូទីន និងលោក ហ្សេឡិនស្គី “ដើម្បីនាំមកនូវសន្តិភាពនិងបញ្ចប់ជម្លោះនេះជាចុងក្រោយ”។

ប្រភពមួយដែលបានដឹងអំពីផែនការនេះបានបញ្ជាក់ថា នឹងមានការជួបគ្នារវាងមន្ត្រីអាមេរិក និងរុស្ស៊ីនៅអារ៉ាប៊ីសាអូឌីត។ ក្រសួងការបរទេសអាមេរិកមិនទាន់បានឆ្លើយតបភ្លាមៗទៅនឹងសំណើសុំការអធិប្បាយនៅឡើយទេ។

លោក ត្រាំ ដែលបានចូលកាន់តំណែងកាលពីថ្ងៃទី២០ មករា បានសន្យាជាច្រើនលើកថានឹងបញ្ចប់សង្គ្រាមអ៊ុយក្រែនឱ្យបានឆាប់រហ័ស។ លោកបានធ្វើការហៅទូរសព្ទដាច់ដោយឡែកពីគ្នាទៅកាន់លោក ពូទីន និងលោក ហ្សេឡិនស្គី កាលពីថ្ងៃពុធ ដែលធ្វើឱ្យសម្ព័ន្ធមិត្តអឺរ៉ុបរបស់វ៉ាស៊ីនតោនមានការព្រួយបារម្ភថា ពួកគេនឹងមិនត្រូវបានដាក់បញ្ចូលក្នុងដំណើរការសន្តិភាពណាមួយឡើយ។

ការភ័យខ្លាចទាំងនោះត្រូវបានបញ្ជាក់ភាគច្រើននៅថ្ងៃសៅរ៍ នៅពេលដែលប្រតិភូពិសេសរបស់លោក ត្រាំ សម្រាប់អ៊ុយក្រែនបាននិយាយថា អឺរ៉ុបនឹងមិនមានកន្លែងអង្គុយនៅតុចរចាទេ បន្ទាប់ពីវ៉ាស៊ីនតោនបានផ្ញើកម្រងសំណួរទៅកាន់រដ្ឋធានីអឺរ៉ុប ដើម្បីសួរថាតើពួកគេអាចរួមចំណែកអ្វីខ្លះដល់ការធានាសន្តិសុខសម្រាប់ក្រុងគីវ។

• កិច្ចព្រមព្រៀងរ៉ែ

កាលពីថ្ងៃសៅរ៍មុននេះ លោក រូប៊ីយ៉ូ បាននិយាយជាមួយសមភាគីរុស្ស៊ីរបស់លោក គឺលោក សែរហ្គី ឡាវរ៉ូវ។ ពួកគេបានឯកភាពគ្នាលើការទំនាក់ទំនងជាទៀងទាត់ដើម្បីត្រៀមរៀបចំការជួបគ្នារវាងលោក ពូទីន និងលោក ត្រាំ នេះបើយោងតាមក្រសួងការបរទេសរុស្ស៊ីបានឱ្យដឹង។

លោក ហ្សេឡិនស្គី បាននិយាយកាលពីថ្ងៃសុក្រថា លោកនឹងទៅទស្សនកិច្ចនៅអេមីរ៉ាតអារ៉ាប់រួម អារ៉ាប៊ីសាអូឌីត និងតួកគី ប៉ុន្តែមិនបានបញ្ជាក់ថានៅពេលណានោះទេ។ ទោះយ៉ាងណា មេដឹកនាំអ៊ុយក្រែនបាននិយាយថា លោកគ្មានគម្រោងជួបជាមួយមន្ត្រីអាមេរិក ឬរុស្ស៊ីក្នុងអំឡុងពេលទស្សនកិច្ចទាំងនោះទេ។

មូស្គូគ្រប់គ្រងទឹកដីមួយភាគប្រាំនៃអ៊ុយក្រែន ហើយបានវាយលុកទៅមុខយឺតៗនៅភាគខាងកើតអស់រយៈពេលជាច្រើនខែមកហើយ ខណៈដែលកងទ័ពតូចជាងរបស់គីវកំពុងប្រឈមនឹងការខ្វះខាតកម្លាំងមនុស្ស និងព្យាយាមការពារផ្នែកមួយនៃទឹកដីនៅរុស្ស៊ីខាងលិច។

រុស្ស៊ីបានទាមទារឱ្យគីវប្រគល់ទឹកដី និងក្លាយជាប្រទេសអព្យាក្រឹតជាអចិន្ត្រៃយ៍ក្រោមកិច្ចព្រមព្រៀងសន្តិភាពណាមួយ។ អ៊ុយក្រែនទាមទារឱ្យរុស្ស៊ីដកទ័ពចេញពីទឹកដីដែលបានកាន់កាប់ និងចង់បានសមាជិកភាពណាតូ ឬការធានាសន្តិសុខស្មើគ្នាដើម្បីការពារការវាយប្រហារពីមូស្គូ។

• មាតិកាឧបត្ថម្ភ

សហរដ្ឋអាមេរិក និងអឺរ៉ុបបានផ្តល់ជំនួយយោធាដល់អ៊ុយក្រែនរាប់សិបប៊ីលានដុល្លារតាំងពីសង្គ្រាមបានចាប់ផ្តើម។ លោក ត្រាំ បាននិយាយថា លោកគាំទ្រអ៊ុយក្រែន ប៉ុន្តែកំពុងស្វែងរកសន្តិសុខសម្រាប់មូលនិធិអាមេរិកសម្រាប់គីវ។

សហរដ្ឋអាមេរិក និងអ៊ុយក្រែនកំពុងចរចាកិច្ចព្រមព្រៀងមួយដែលអាចបើកឱ្យមានការវិនិយោគរបស់អាមេរិកទៅលើធនធានធម្មជាតិដ៏ធំធេងរបស់អ៊ុយក្រែន។

ប្រភពបីបាននិយាយថា អាមេរិកបានស្នើសុំកម្មសិទ្ធិ៥០ភាគរយនៃរ៉ែសំខាន់ៗរបស់អ៊ុយក្រែន។ លោក ហ្សេឡិនស្គី បាននិយាយកាលពីថ្ងៃសៅរ៍ថា សេចក្តីព្រាងកិច្ចព្រមព្រៀងមិនមានបទប្បញ្ញត្តិសន្តិសុខដែលគីវត្រូវការនោះទេ៕
ប្រភព៖ Reuters